ញូវហ្សេលែន៖ កីឡាការិនីញូវហ្សេលែន Laurel Hubbard ដែលបានវះកាត់កែភេទពីបុរសមកជាស្រ្តី បានក្លាយជាអត្តពលិកកែភេទដំបូងបង្អស់ដែលត្រូវបានជ្រើសរើសឱ្យចូលរួមប្រកួតប្រជែងក្នុងព្រឹត្តិការណ៍អូឡាំពិកទីក្រុងតូក្យូ ឆ្នាំ២០២០ ក្នុងពេលដែលមានមតិប្រឆាំងគ្នាជាច្រើនត្រូវបានលើកឡើង ទាំងការគាំទ្រ និងការរិះគន់ចំពោះការសម្រេចនេះ។

មន្រ្តីផ្លូវការបានជ្រើសរើស និងអនុញ្ញាតឱ្យ​ Laurel Hubbard ទទួលបានសិទ្ធិពេញលេញក្នុងការប្រកួតតំណាងញូវហ្សេលែន ក្នុងនាមអត្តពលិកជានារីលើវិញ្ញាសារលើកទម្ងន់ (weightlifting) ក្រោយគណៈកម្មការបានពិនិត្យ និងពិចារណាទៅលើលក្ខខណ្ឌពាក់ព័ន្ធ។ មុនត្រូវបានជ្រើសរើសឱ្យប្រកួតប្រជែងក្នុងនាមជាអត្តពលិកនារីនេះ Hubbard​ ក៏ធ្លាប់បានចូលរួមប្រកួតលើវិញ្ញាសារលើកទម្ងន់ផ្នែកបុរសផងដែរកាលពីពេលកន្លងមក មុននឹងនាងសម្រេចវះកាត់កែភេទនៅក្នុងឆ្នាំ ២០១៣។

ក្នុងសេចក្តីប្រកាសផ្លូវការរបស់គណៈកម្មការអូឡាំពិកញូវហ្សេលែន ចេញផ្សាយនៅថ្ងៃចន្ទនេះ អត្តពលិកវ័យ ៤៣ឆ្នាំខាងលើនិយាយថា "នាងពិតជាសូមថ្លែងអំណរគុណ និងកោតសរសើរខ្លាំងបំផុតចំពោះទឹកចិត្ត និងការគាំទ្ររបស់ប្រជាជនញូវហ្សេលែនជាច្រើនលើសលុបមកលើរូបនាង"។ គួរបញ្ជាក់ថា Laurel Hubbard នឹងត្រូវធ្វើការប្រកួតប្រជែងក្នុងវិញ្ញាសារលើកទម្ងន់ ៨៧គីឡូក្រាមផ្នែកនារី៕